Повик за мали и локални медиуми во Северна Македонија

Каква поддршка ќе добијат медиумите?

За разлика од класичните обуки, оваа програма е фокусирана на директни и практични решенија. Тоа значи дека експертите нема само да ви објаснуваат што треба да направите, туку директно ќе ви помогнат околу поставувањето, конфигурирањето и решавањето на техничките проблеми, за вие да се фокусирате на новинарството:

• Техничка и безбедносна проверка на веб сајтот, вклучително и директно решавање на итните технички проблеми;
• Подобрувања за вашите вести полесно да бидат пронајдени преку Google и ВИ-пребарување (SEO/AEO);
• Бесплатен 12-месечен пристап до професионални ВИ-алатки, избрани според потребите на вашата редакција;
• Конкретен план со алатки и процеси што можат да ѝ помогнат на вашата редакција да заштеди време;
• Индивидуално и групно менторство за тоа како да ја зголемите публиката и како да најдете нови начини за заработка од вашиот медиум;
• Онлајн обуки и работилница во живо;
• Бесплатни готови шаблони за приватност, дигитална безбедност и медиумски стандарди, како Политика за приватност, Импресум и правила за дигитална безбедност.

Кој може да се пријави?

Повикот е наменет за медиуми што работат во Северна Македонија и произведуваат оригинална новинарска содржина за локална или регионална публика:

• локални онлајн информативни портали
• независни дигитални медиуми што известуваат за конкретни заедници;
• мали локални или регионални радио и телевизиски станици со онлајн присуство;
• регионални медиумски организации што покриваат конкретни општини или подрачја со ограничено локално информирање.

Особено се охрабруваат да аплицираат редакции со мали тимови, од еден до пет члена, кои немаат посебен ИТ-кадар или кадар за дигитален развој и имаат ограничени технички и финансиски ресурси. Исто така, се охрабруваат пријави од медиуми раководени од жени, медиуми што објавуваат на јазиците на заедниците и медиуми што известуваат за рурални и недоволно опслужени средини.

Што се очекува од учесниците?

Избраните медиуми треба да покажат уредувачка независност, почитување на професионалните и етичките стандарди и подготвеност за активно учество во 12-месечниот процес на поддршка.

Секој медиум ќе треба:

• да назначи најмалку едно лице за комуникација и координација;
• да учествува во кратка почетна проценка на веб-страницата, дигиталните алатки и потребите на медиумот;
• да учествува во три кратки онлајн обуки, една работилница во живо (со платени патни трошоци) и периодични кратки менторски средби (отприлика еднаш на 3 месеци);
• да соработува со нашиот тим при воведувањето на новите алатки и технички решенија во секојдневната работа;
• да сподели кратко искуство за тоа колку им помогнале алатките за време на програмата.

Како ќе се врши изборот?

Пријавите ќе ги оценува комисија составена од медиумски експерти, според стандардизирани критериуми:

• потребата од дигитална и технолошка поддршка;
• подготвеноста и волјата на тимот да воведе новитети во работата;
• значењето на медиумот за локалната заедница;
• почитувањето на новинарските стандарди и јавниот интерес;
• ќе се настојува да има регионална разновидност, со особено внимание на медиумите што работат во рурални, недоволно опслужени или локални средини.

Бесплатна поддршка со целосна уредувачка независност

Сите услуги во рамки на проектот се бесплатни за избраните медиуми. Поддршката се обезбедува преку услуги, алатки, обуки и менторство, а не преку доделување директни парични грантови. По завршувањето на проектот, трошоците за евентуално продолжување на платените претплати ќе бидат одговорност на медиумот. Во завршната фаза учесниците ќе добијат поддршка за избор на достапни алтернативи. Отворените образовни ресурси (е-курсевите на платформата Journalism Now и материјалите на Journalift) ќе останат бесплатно достапни и понатаму.